Բարև,ես եմ 😊

Բարև, ես Սվետլանան եմ։

Ես 11-րդ դասարանցի եմ։ Ունեմ տարբեր նախասիրություններ։ Դպրոցական առարկաներից նախընտրում եմ կենսաբանությունը և քիմիան։ Այն, ինչ կապված է բնության հետ, ինձ անչափ հետաքրքրում է։ Պարբերաբար հետևում եմ տարբեր բնապահպանական կազմակերպությունների գործունեությանն ու նախագծերին։

Հետաքրքրված եմ նաև լուսանկարչությամբ և ֆիլմերի ստեղծմամբ։ Հետաքրքրությունից ելնելով՝ հաճախ եմ մասնակցում նկարահանումների, երբեմն էլ ինքս եմ նախաձեռնում որևէ հետաքրքիր նախագիծ։ Այդպիսի մի նախագիծ էլ որոշեցի իրականացնել այս ամառվա ընթացքում և այն անվանեցի «Ճանաչենք…»։

Հայաստանում կան շատ վայրեր, որոնց մասին մենք չգիտենք կամ էլ գիտենք մասամբ, դրա համար էլ որոշեցի նկարահանել, մոնտաժել և կարճամետրաժ «ֆիլմիկներ» ստեղծել։

Դե, ինչ, ինձ թվում է՝ արդեն պարզ է այսպիսի հետաքրքրություններ ունեցողիս տպավորությունն առաջին հայացքից, երբ նա հայտնվում է Մխիթար Սեբաստացի կրթահամալիրում։ Որպես նորեկ՝ այսօր առաջին անգամ էի կրթահամալիրում։ Գունեղ, պոզիտիվ, նախաձեռնողական միջավայր, նոր ու հետաքրքիր մտքեր։ Համոզված եմ, որ այստեղ կզբաղվեմ այն ամենով, ինչով սրտանց ուզում եմ զբաղվել։